“Daily mail”, reportazh për turizmin në Shqipëri

“Ju kujtohet Shqipëria? Vendi i krisur komunist, ku të huajt që kishin flokë të gjatë, i qethnin në aeroport; aty ku urrenin çdo gjë perëndimore, por megjithatë çmendeshin për filmat e Norman Uisdom, i njohur si Pit Kini? Epo, tashmë, çdo gjë ka ndryshuar…” Me këto fjalë, gazeta prestigjioze britanike “Daily Mail”, nis një reportazh të gjatë mbi vendin tonë. “Cepi i fundit i Europës”, – titullohet artikulli në fjalë. Në të nënvizohet se plazhet dhe bukuritë e Shqipërisë janë një okazion i fshehur në Ballkan, për të gjithë turistët e huaj. Vendi ynë krahasohet me Spanjën e 50 viteve më parë, kjo më shumë sa i përket çmimeve të lira. “Ndaluni në bregun e Adriatikut dhe shijoni kilometra të tëra plazhesh rëre, teksa çmimet e lira do t’ju sjellin buzëqeshje. Kafja kushton vetëm 40 pens, birra 90 pens, çmime këto më pak se një sterlinë, ndërsa një shishe verë mesatarisht, është vetëm katër sterlina”, theksohet në shkrimin e së përditshmes. Në reklamimin që e famshmja “Daily Mail” i bën turizmit shqiptar para britanikëve, vihet në dukje edhe distanca e afërt e Londrës me Tiranën, vetëm tre orë me avion, që është kohë më e shkurtër se sa të shkosh në Greqi.  Në shkrim, flitet me superlativa për kryeqytetin, Tiranën, apo qendrat historike si Kruja, Shkodra apo qytete të tjera. Më pas, përshkruhet vija bregdetare, duke nisur nga plazhet e Durrësit e deri të riviera e mrekullueshme joniane. Ndërsa në fund, disa këshilla mbi gjuhën, ku turistëve u tregohet se si të përshëndesin në gjuhën shqipe, apo se si të falënderojnë për shërbimet që u ofrohen.

 




Facebook Auto Publish Powered By : XYZScripts.com